“Jah know dah mango deh ready eeh!”
Mek a tell you anedda ting bout Jamaica.
We full up a fruit tree.
When mi look out mi winda a mi yaard, mi see whole heap a roof top and satellite dish and water tank and ting. But spotting di scenery, a di lush green mango tree dem, di ackee tree, mi see one cokenat tree, mi see tambrin tree, mi see arringe tree, an mi see all sort a odda tree weh mi not even know di name dem.
You know what is di bes ting bout dem tree deh?
De fruit dem saweet you see ma! You eva have one mango yet?
Mek a tell you, we have so much diffrant mango mi cyaan even count dem pan mi hand show you.
My personal favrit is de Julie mango . . . mmmm! Mi can taste it even now. Mi also love a Bombay mango – tell you what, de bigga di mango, di betta fi me.
And you know wha a di betta ting bout dem tree deh? Dem deh evrywhere.
An we have a ting bout we you see. If we see a mango weh we want an we can reach it, we ago tek it. A nuff teef we teef, but a mango tree is God gift to we, an more time de owna nah pick di mango dem so, we help dem out a likkle.
Man, I love siddung a mi yard an just watch di tree dem. An dem look pretty when it rain too you see. A di pretties’ green mi eva did see.
An a dat mi love . . . we nuh jus have tree, we have di sweetes’ fruit trees like woaw!